Home  >  TECH IN DETAIL  >   TECH IN DETAIL DETAILS
സാറ്റലൈറ്റ് നാവിഗേഷന്‍ സിസ്റ്റം
ഡാനി ഏബ്രഹാം


സഞ്ചാരികള്‍ക്ക് നല്ലൊരു വഴികാട്ടിയാവുന്ന സാറ്റലൈറ്റ് നാവിഗേഷന്‍ സിസ്റ്റം കാറുകളില്‍ വ്യാപകമായിക്കൊണ്ടിരിക്കുകയാണ്. ഈ സംവിധാനം എങ്ങനെയാണ് നമ്മള്‍ നില്‍ക്കുന്ന സ്ഥലവും പോകേണ്ട സ്ഥലത്തേയ്ക്കുള്ള വഴിയുമൊക്കെ കൃത്യമായി കാണിച്ചുതരുന്നതെന്ന് അറിയണമെന്നില്ലേ. അതേപ്പറ്റി വിവരിക്കുകയാണിവിടെ.


ജിപിഎസ് എന്ന ചുരുക്കപ്പേരില്‍ അറിയപ്പെടുന്ന ഗ്ലോബല്‍ പൊസിഷനിങ് സിസ്റ്റമാണ് നാവിഗേഷന്‍ സിസ്റ്റങ്ങളുടെ അടിസ്ഥാനം. മൂന്ന് പ്രധാന ഘടകങ്ങള്‍ ജിപിഎസിനുണ്ട്. കൃത്രിമ ഉപഗ്രഹങ്ങള്‍ , ബേസ് സ്റ്റേഷനുകള്‍ , റിസീവര്‍ എന്നിവയാണവ. ഇവ മൂന്നിന്റെയും സമന്വയിച്ചുള്ള പ്രവര്‍ത്തനമാണ് കൃത്യമായ സ്ഥാനനിര്‍ണ്ണയം സാധ്യമാക്കുന്നത്.


ആദ്യം ജിപിഎസ് സാറ്റലൈറ്റുകളെ പറ്റി പറയാം. സൈനികാവശ്യം ലക്ഷ്യമിട്ടു അമേരിക്കയാണ് ആദ്യം ഇത്തരം സാറ്റലൈറ്റുകള്‍ വിക്ഷേപിച്ചത്. 1989 നും 1994 നും ഇടയ്ക്ക് പ്രവര്‍ത്തനക്ഷമമായ 27 സാറ്റലൈറ്റുകള്‍ ഉള്‍പ്പെടുന്ന ആധുനിക സംവിധാനമാണ് പുതിയ ജിപിഎസ് സംവിധാനത്തിലുള്ളത്. ഇതില്‍ 24 സാറ്റലൈറ്റുകള്‍ പൂര്‍ണ്ണ പ്രവര്‍ത്തനസജ്ജമാണ്. ഈ സാറ്റലൈറ്റുകളില്‍ എതെങ്കിലുമൊന്ന് പ്രവര്‍ത്തനരഹിതമായാല്‍ ബാക്കിയുള്ള മൂന്നു സാറ്റലൈറ്റുകളില്‍ ഒരെണ്ണം പകരം പ്രവര്‍ത്തിക്കും.
GPS Navigation
പ്രധാനമായും സൈനികാവശ്യത്തിനായി ഉപയോഗിക്കുന്നതിനാല്‍ സിവിലിയന്‍ ഉപയോഗങ്ങള്‍ക്കായി ലഭിക്കുന്ന സിഗ്‍നലുകളില്‍ ആദ്യമൊക്കെ നൂറു ശതമാനം കൃത്യത ഇല്ലായിരുന്നു. എന്നാല്‍ സൈനികാവശ്യത്തിനു ഉപയോഗിക്കുന്ന അതേ സിഗ്‍നല്‍ സിവിലിയന്‍ ഉപയോഗത്തിനായി നല്കാമെന്ന് 2000ല്‍ അമേരിക്ക നിയമം പാസാക്കിയതോടെ 15 മീറ്ററിനുള്ളില്‍ വരെ കൃത്യമായി സ്ഥാനം നിര്‍ണ്ണയിക്കാമെന്നായി. അമേരിക്കന്‍ പ്രതിരോധ വകുപ്പിനു കീഴിലുള്ള ഈ സാറ്റലൈറ്റുകളുടെ സേവനം ലോകം മുഴുവന്‍ സൗജന്യമായാണ് നല്കപ്പെടുന്നത്.


ഇന്ന് രാജ്യസുരക്ഷയില്‍ സുപ്രധാന സ്ഥാനം ജിപിഎസിനുണ്ട്. അതുകൊണ്ടുതന്നെ അമേരിക്കയില്‍ വികാസം പ്രാപിച്ച ജിപിഎസ് സംവിധാനത്തിന് ബദലായി ഇന്ത്യ അടക്കമുള്ള രാജ്യങ്ങള്‍ ജിപിഎസിനുള്ള കൃത്രിമ ഉപഗ്രഹ കൂട്ടം ഒരുക്കുന്നുണ്ട്.  24 ഉപഗ്രഹങ്ങള്‍ വീതമുള്ള അമേരിക്കയുടെ ജിപിഎസും റഷ്യയുടെ ഗ്ലോനാസുമാണ് ഇപ്പോള്‍ പൂര്‍ണ്ണമായും പ്രവര്‍ത്തനസജ്ജമായ രണ്ട് ഗ്ലോബല്‍ സാറ്റലൈറ്റ് നാവിഗേഷന്‍ സിസ്റ്റങ്ങള്‍.
GPS Navigation
ജിപിഎസ് സംവിധാനത്തിലുള്ള സാറ്റലൈറ്റുകള്‍ ഭൗമോപരിതലത്തില്‍ നിന്നും ഏകദേശം ഇരുപതിനായിരം കിലോമീറ്റര്‍ അകലെ ഭൂസ്ഥിര ഭ്രമണപഥത്തിലാണ് ഭൂമിയെ ചുറ്റി സഞ്ചരിക്കുന്നത്. കൃത്യമായ ഭ്രമണ പഥത്തിലൂടെ ദിവസവും രണ്ടു തവണ വീതം ഈ സാറ്റലൈറ്റുകള്‍ ഭൂമിയെ വലം വയ്ക്കുന്നുണ്ട്. ഇവയില്‍ നാലെണ്ണമെങ്കിലും ഏതു സമയത്തും ഭൂമിയിലെവിടെ നിന്നും ബന്ധപ്പെടാന്‍ സാധിക്കുന്ന വിധത്തിലായിരിക്കും ഭൂമിയെ ചുറ്റി സഞ്ചരിക്കുന്നത്. അതായത് ഭൗമോപരിതലത്തില്‍ എവിടെയാണെങ്കിലും ഒരേ സമയം നാല് സാറ്റലൈറ്റുകളുടെ ദൃഷ്ടിയില്‍ പെടും. പത്തു വര്‍ഷത്തോളം മാത്രം ആയുസ്സ് കല്‍പ്പിച്ചിട്ടുള്ള ഈ ശ്രേണിയിലെ സാറ്റലൈറ്റുകള്‍ ക്യത്യമായ ഇടവേളകളില്‍ അപ്ഗ്രേഡു ചെയ്യാറുണ്ട്. 


സാറ്റലൈറ്റുകളില്‍ നിന്നുള്ള സിഗ്നലുകളുടെ കൃത്യത ഉറപ്പുവരുത്താന്‍ ഭൂമിയില്‍ പലയിടത്തായി സ്ഥാപിച്ചിരിക്കുന്ന നിരീക്ഷണ നിലയങ്ങള്‍ അഥവാ ബേസ് സ്റ്റേഷനുകളാണ് ജിപിഎസ് നാവിഗേഷന്റെ രണ്ടാമത്തെ പ്രധാന ഘടകം. നിലവില്‍ മൊബൈല്‍ ഫോണ്‍ ടവറുകളെയാണ് ഇതിനായി ആശ്രയിക്കുന്നത്. ഇത് സ്ഥാന നിര്‍ണ്ണയം കൂടുതല്‍ ക്യത്യതയുള്ളതാക്കുന്നു.


ബഹിരാകാശത്തുനിന്നുള്ള റേഡിയോ സിഗ്നലുകളെ പിടിച്ചെടുക്കാന്‍ കഴിവുള്ള ജിപിഎസ് റിസീവറാണ് മൂന്നാമത്തെ ഭാഗം. സ്മാര്‍ട്ട്ഫോണുകളും കാര്‍ നാവിഗേഷന്‍ സിസ്റ്റത്തിലുമൊക്കെ ഇതുണ്ട്.
GPS Navigation
ഭൂമിയിലെ എല്ലാം നാല് ഉപഗ്രഹങ്ങളുടെ കണ്ണില്‍ പെടുമെന്നുമെന്ന് പറഞ്ഞല്ലേോ. ഇവ നാലില്‍ നിന്നുമുള്ള സിഗ്നലുകള്‍ പിടിച്ചെടുത്ത് വിശകലനം ചെയ്താണ് റീസിവര്‍ സ്ഥാനം നിര്‍ണ്ണയിക്കുന്നത്. സിഗ്നലുകള്‍ റിസീവറിലെത്താന്‍ എടുത്ത സമയത്തില്‍ നിന്ന് ഉപഗ്രഹത്തില്‍ നിന്നു റിസീവറിനുള്ള അകലം കണക്കാക്കും. മൂന്ന് സാറ്റലൈറ്റുകളില്‍ നിന്നുമുള്ള അകലത്തിന്റെ തോത് ഉപയോഗിച്ച് സങ്കീര്‍ണ്ണമായ ഗണിതപ്രക്രീയയിലൂടെ റിസീവര്‍ ഭുമിയിലെ സ്ഥാനം നിര്‍ണ്ണയിക്കുന്നു. നാലാമത്തെ ഉപഗ്രഹത്തില്‍ നിന്നുള്ള വിവരവും ബേസ് സ്റ്റേഷനില്‍ നിന്നുള്ള വിവരവും നിര്‍ണ്ണയിക്കപ്പെട്ട സ്ഥാനത്തിന്റെ കൃത്യത ഉറപ്പുവരുത്താന്‍ റിസീവര്‍ ഉപയോഗിക്കും. രേഖാംശം, അക്ഷാംശം , ഉയരം , സമയം എന്നീ നാലു കാര്യങ്ങളാണ് റിസീവര്‍ വിശകലനം ചെയ്യുന്നത്. അതുകൊണ്ടുതന്നെ നാല് ഉപഗ്രഹങ്ങളില്‍ നിന്നെങ്കിലുമുള്ള സിഗ്നല്‍ ലഭിച്ചാല്‍ മാത്രമേ ജിപിഎസ് റിസീവറിന് കൃത്യമായ സ്ഥാന നിര്‍ണ്ണയം നടത്താനാകു.
GPS Navigation
ജിപിഎസിന്റെ സഹായത്തോടെ ഡിജിറ്റല്‍ ഡിസ്പ്ലേ യൂണിറ്റില്‍ ആവശ്യമായ വിവരങ്ങള്‍ കാണിച്ചുതരുകയാണ് നാവിഗേഷന്‍ സിസ്റ്റത്തിന്റെ ജോലി. ഇതിന്റെ മികവ് അതിലുള്ള മാപ്പിന്റെ കൃത്യതയെയും പ്രൊസസ്സറിനെയും ആശ്രയിച്ചിരിക്കുന്നു. റോഡുകള്‍ , സ്ഥലനാമങ്ങള്‍, റെയില്‍ പാതകള്‍ ‍, ഹോട്ടലുകള്‍ , എടിഎം കൌണ്ടറുകള്‍ , സൂപ്പര്‍ മാര്‍ക്കറ്റുകള്‍, ആശുപത്രികള്‍ , ആരാധനാലയങ്ങള്‍, പെട്രോള്‍ പമ്പുകള്‍, മറ്റ് പ്രധാന സ്ഥാപനങ്ങള്‍ എന്നിങ്ങനെ എല്ലാത്തരം വിവരങ്ങളും രേഖപ്പെടുത്തിയ മാപ്പുകളാണ് നാവിഗേഷന്‍ സിസ്റ്റങ്ങളില്‍ ഉള്ളത്. ഇവയ്ക്ക് നമ്മുടെ സ്ഥാനം മാത്രമല്ല, ലക്ഷ്യസ്ഥാനത്തേക്കുള്ള വ്യത്യസ്ത മാര്‍ഗ്ഗങ്ങള്‍, ഓരോന്നിലേയ്ക്കുമുള്ള ദൂരം, ട്രാഫിക് സിഗ്നലുകള്‍, വളവുകള്‍ എന്നിവയെല്ലാം കാണിച്ചുതരും. അതതു സമയത്തെ ട്രാഫിക്ക് സാഹചര്യങ്ങളെക്കുറിച്ചു കൂടി വിവരം ലഭിക്കും. അതായത് ജിപിഎസ് നാവിഗേഷന്‍ സിസ്റ്റം കൂടെയുണ്ടെങ്കില്‍ ഏത് അറിയാത്ത സ്ഥലത്തേക്കും ധൈര്യമായി യാത്രക്കൊരുങ്ങാം എന്ന് ചുരുക്കം.



Related Stories







TOP


Car Bike








Designed and developed by EGGS